JUDASI

Batheleka njengonyazi
Bonke bajuluke bemanzi
Ungathi bathelwe ngamanzi
Ngokuba babengamazi
Bathi Judasi
Uphi wena uyamazi
Nami angimazi
Judasi nab’ubukhazikhazi
Yilowaya ngentshebekazi
Judasi bafanabonke ngezintshebekazi
Yilowaya ngengubokazi
Judasi ubukhazikhazi
Kulungile ngizokumhlangabeza njengentandokazi
Ngimphuthume njengentsengwakazi
Ngimmange njengonkosikazi
Laphalala igazi
Kuleloshashalazi
Zagobhoza izinyembezi
Kubobonk’ababemazi
Ikakhulukazi amakhosikazi

Kwakhumbuleka leyomini mhla bedl’umzimba negazi
Wathi zihlobo zam’ zegazi
Ukhona phakathi kwen’ozothengisa ngelami igazi
Mina ngiyamazi
Naye uyazazi
Kepha nina animazi
Kwabawusizi
Umunyu nezinyembezi
Ngisho nakuzo izingelosi
Mhla ehliswa uBharabhasi
Ephanyekwa umsindisi
Kwaba yintokozo kubaPristi naFarisi
Abathi makafe umkhohlisi
Ozibiza ngenkosi
Yamakhosi
Waphanyekwa nezelelesi
Esinye sathi kungan’ungazisindisi
Uma uyindodana yenkosi
Kepha esinye sathi ngiyazi
Ukuthi nguwe umsindisi
Wathi namhlanje ngikuzoba naw’ ePharadesi
Myeke lona uzosala yedw’ eHayidesi

Wazisola uJudasi
Wafana noJonasi
Mhla egwinywe yinhlanzi
Amen zihlobo zam’zegazi
Haleluya zihlobo zam zegazi

Ngalobobusuku kwesikabhadakazi
Kwakukhona unkosikazi
Owabona uPitrosi
Ezifihle ngengubokazi
Wasondela wathi ngiyamazi
Ubehamba naye ngiyazi
Nguye ngiyamazi

Zasondela izingwazi
Zathi ndoda uyamazi
Cha angimazi
Zathi ndoda asikubuzi
Siyakutshela sithi uyamazi
Siyangisukela lesalukazi
Mina angimazi
Heyi wena mfokazi
Ungangibizi ngesalukazi
Awuboni ngiyintokazi
Ngiyakutshel’uzofiny’igazi
Ngoba uyamazi
Uyabheda mfazi
Ngingamane ngilifiny’igazi
Ngoba angimazi

Lakhala iqhude kwakhumbuleka lawomazwi
Mhla behleli ngaphansi
Komthunzi
Wakhuluma uPitrosi
Wathi sihlobo sam’segazi
Mhla lichitheka elakho igazi
Nelam’liyophalala njalo igazi
Kepha yena wathi Pitrosi
Ngiyazi angidingi bufakazi
Ngazi kahle kuhle kwezazi
Zasempumalang’ezaziholwa yinkanyezi
Ukuthi buzogcwaliseka ubufakazi
Alotshiwe lawamazwi
Wena awazi
Mina ngiyazi
Uzongiphika kathathu singakakhal’isikhukhukazi
Ngiyaxolisa ngisho iqhude nawe uyazi
Wazisola uPitrosi
Wafana noJonasi
Mhla egwinywe yinhlanzi
Ngakho zihobo zam’ zegazi
Zifihleni ngaphansi
Kwegazi
Ngaphansi kwegazi
Ngaphansi kwegazi

MHLABA

Namhlanje ngiyahloma ngiyahlasela
Ngihlasela ngiyisihlabane soqobo ngoqobo
Ngazalwa ngimuhle kukuhle kusentwasahlobo
Ngahlaba ngisamila njengomthente
Nanamuhla ngisahlaba ngiyahlaba angihlehli
Angihlabi ngiyahlikiza
Mangihlab’anginabuhlobo
Ngihlub’udlub’ekhasini
Ngiyisihlaban’esinobuhlakan’esihlaba
Sihleke singahlukumezi
Mhla mhlaba mhlaba

Mhlaba ngikhuz’umhlola
Mhlaba ngikhuz’inhlekelele
Hleze inhluphek’izophela
Lomhlambi mawuhlangan’uyemhlahlweni
Kuyohlolwa kuhlelwe kuhluzwe kuhlaziywe
Ngokulahlwa kwezilimi zohlanga
Inhlonipho nobuhlanga
Mhlaba lento ayihlekisi
Ibuhlungu iyahlasimulisa
Mhlaba

Hlomla Hlongwane ninoHleziphi Hlabangane
Nisho kanjan’ukuthj’uHlengiwe Hlatshwayo
WaseMahlabathini yingan’ehlakaniphile
Ngoba nimlahlis’ulimi lakubo namfundis’islumbi kuphela na
Hlokoza Hlophe ninoLahliwe Nhlapho
Nisho kanjani ukuthi
uHluphekile Mhlongo waKwamhlab’uyalingana
Yingan’engahlakaniphanga ngob’engalahlanga
Ulimi lakubo lohlanga ehlulwa yisilumbi kuphela na

Aniboni ngani niluhlaza
Kuhlwil’emqondweni nihlakaniphe ngamehlo kuphela
Nihlakaniphenganxany’ okommese
Niyahlomeka zihliphi ndini
Anihlakaniphanga
Mhlaba awuhlakaniphanga
Awuhlakaniphanga kuhle komakhal’ekhukhwini
Ohlalele’ukukhal’emngcwaben’abantu bethandaza
Awuhlakaniphanga kuhle komunt’ohlalel’ukuhlahlamehlo
Endlini yangases’engahluthuleleanga nomnyango
Awuhlakaniphanga kuhle kohlany’ehlathini
Oluhlalel’ukuhlabelela luhleke
Kuze kuhlwe awuhlakaniphanga
Awuhlakaniphanga kuhle kokudl’okungenamhluzi
Awuhlakaniphanga awunamahloni
Awunamahlon’ulahle isiko
Walahla inkolo
Ulahle imfundo
Walahla umlando
Ulahle ubuntu bakho
Walahla ubuzwe bakho
Ulahle ubuwena bakho
Walahla ubuhle besikhumba sakho
Nezinwele zakho ngokuhlikihl’imithi yesilumbi
Eshisay’enukisayo
Ulahle ubulili bakho
Namhlanj’usulahl’ulimi lwakho
Awunamahloni

Hlakanipha mhlaba
Ufundis’ingan’inhlonipho nezilimi zohlanga
Uyek’ukusinis’amahleza hlakanipha
Lent’ibuhlungu iyahlasimulisa
Iyahlukumeza iyinhlekisa
Ihlukumeza kuhle kwesihliling’
Emehlwen’enyon’esihlahleni
Ngihlalwe yilahl’emhlane kuythi mangihlanze
Ngikhihl’isililo kuhlengezel’emehlweni
Zize zehlel’ezihlathin’izinyembezi
Hlakanipha mhlaba

Hlakanipha ngizoze ngikuhluthule ngesihluthu
Ngikuhlephule ngenhlanakela
Hlakanipha njengohlathi
Wona ogoba ubheke le ubheke nale
Hlakanipha njengomhlanga won’ogoba uyise le na le
Hlakanipha ngingaze ngikuhlambalaze ngikuhlaze
Uyohla phezu kegeja lishisa
Kuze kuhlangan’isisu nomgogodla
Hlakanipha lesihliphi lesihleza
Uyahleka

Website developed by Lynn Danzig